Esaten deuste ez dodala begietara begiratzen

ESATEN DEUSTE EZ DODALA BEGIETARA BEGIRATZEN

Esaten  deuste ez dodala begietara begiratzen,

nere begirada uzkurra dala,

bapateko usoen hegaldia lakoa;

uretara trabes botaten dan harri txingorra lez,

saltoka behatzen dodala, saiheska,

ur sakonen gainetik doan

harri-txingorra moduan

hondora joan barik

nere begirada lotsankorra da;

beharbada minaren beldur,

koldarra da.

Esaten deuste  begirada izutia dodala;

leihoko kristalean kolpeka galdurik

noraezean dabilen tximeleta lakoa;

jauzika behatzen dodala, trabes.

Etxetik aparte dabilen txakurra legetxe,

batengana eta bestearengana hurreratzen nazela

laztanen bila, makur, ostikaden beldur,

onartua izanda be, segituan

iges egiteko ikara batean.

Nere begirada hauskorra da,

ogi pusketa legetxe errekan;

berharbada minaren beldur,

mintzen da esperantza bakoen

mugen arantzetan.

Esaten deuste, eta halan izango da,

ze ni neu sarritan ez naz konturatzen,

begietara ez dodala begiratzen,

baina ez nintzateke zure begiradari iges

egiteko kapaz, jakinda be,

saltoka tximeleta lez ur gainean,

bapateko usoen hegaldi isladatua urmaelean,

berdur izango nintzatekeala

sentimenduen uhinetan onartua ez izateko,

 igesean doan gaueko txakur zaunka lez.